Jashari kërkon nga institucionet që të sigurojnë tregun për produktet e qumështit

Kryetari i komunës së Skenderajt, Bekim Jashari ka takuar një delegacion të përpunuesve dhe grumbulluesve të qumështit, të cilëve iu ka ofruar mbështetje dhe njëkohësisht ka kërkuar nga institucionet tona që të punojnë̈ seriozisht në sigurimin e tregut për produktet e qumështit.

Jashari ka thënë se pas homazheve që kanë bërë në Kompleksin Memorial “Adem Jashari”, kanë biseduar rreth sfidave që ka kjo kategori ekonomike, në sigurimin e tregut për produktet e tyre.

“Në emër të komunës së Skenderajt, i ofrova mbështetjen time, ashtu siç i kemi përkrahur deri me tani, në veçanti gjatë shpërndarjes së pakove ushqimore për familjet në nevojë, me ç’rast në pako ushqimore kemi përfshirë edhe produkte ushqimore, duke bërë kështu që produktet ushqimore të fermerëve tonë të mos mbesin pa u shitur”.

“Njëkohësisht kërkoj nga institucionet tona që të punojnë seriozisht në sigurimin e tregut për produktet e qumështit. Delegacioni në fjalë ka vizituar edhe dy pika grumbulluese të qumështit në qytetin tonë, atë të Naser Bajraktarit dhe Mentor Miftari, të cilët i inkurajuam që të vazhdojnë me punën e tyre pavarësisht sfidave që kanë”, ka shkruar ai në Facebook.