Deputeti i AAK-së, Daut Haradinaj, ka reaguar rreth deklaratës së deputetes së LVV-së, Fitore Pacolli.
Deputeti i Aleancës për Ardhmërinë e Kosovës (AAK), Daut Haradinaj, ka folur për deklaratën e deputetes së Lëvizjes Vetëvendosje, Fitore Pacolli.
Haradinaj ka reaguar pasi që, Pacolli kishte thënë se, Ramush Haradinaj kur ishte në postin e kryeministrit, kishte dërguar nënën e tij për shërim jashtë vendit.
Përmes një postimi në profilin e tij zyrtar në rrjetin social Facebook, Daut Haradinaj, ka shkruar se, nuk beson që deputetja Pacolli ka dashur të ofendojë nënat shqiptare, përcjell lajmi.net.
Postimi i plotë i Haradinajt, pa ndërhyrje:
Nuk besoj që Fitore Pacolli ka dashur të ofendojë nënat shqiptare e aq më pak nënën time e cila sot ka përvjetorët e dy djemve të saj.
Deputetja e Parlamentit të Kosovës nuk besoj që e ka pasur me të keq dhe në tone përçmuese deklaraten e saj në televizion, aq më pak kur nëna ime është shëruar në shtetin amë Shqipëri.
Kur është fjala për nënat tona shqiptare, besoj që të gjithë jemi një.
