Për shkak të një standardi më të mirë të transparencës në punën e policëve dhe rritjes së besimit tek Policia nga ana e publikut, në Shqipëri dhe shumë vende tjera u janë vendosur pjesës dërmuese të policëve kamerat në trup. Megjithatë, në Kosovë ende nuk është marrë në vendim i tillë.
Zyra për informim e Policisë së Kosovës, ka bërë të ditur për lajmi.net, se posedojnë persona adekuat të cilët i përcjellin detajisht me kamera rastet e duhura.
“Varësisht prej nevojave operacionale, Policia e Kosovës ndërmerr veprimet e nevojshme për të arritur objektivat e saj qoftë edhe duke realizuar apo autorizuar xhirimet edhe përmes kamerave”.
Kamera e cila vendoset në trupin e policëve, është instrument i fuqishëm antikorrupsion dhe gjithashtu rrit standardin e sigurisë tek policët. Me anë të saj regjistrohen edhe bisedat mes policëve dhe qytetarëve.
“Policia e Kosovës për realizimin e detyrave dhe autorizimeve të saj sipas ligjit angazhon kapacitetet e saj në dispozicion duke përfshirë edhe pajisjet e parapara për realizim efektiv dhe arritje të objektivave ligjore”, thuhet në përgjigjen e Zyrës për informim.
Policia e Kosovës bëri të ditur se fillimisht nuk janë të planifikuara që këto kamera të hyjnë në funksion edhe tek Policët e Kosovës, pasi ende nuk është parë e arsyeshme të vendoset tek pjesa e tyre dërrmuese, pasi që një pjesë e tyre vetëm se posedojnë kamera të tilla atëherë kur ata e shohin të rëndësishëm ndonjë operacion nga ana e tyre.
