Ende asnjë zyrtar i Aleancës për Ardhmërinë e Kosovës nuk ka dalur me një qëndrim për deklaratat e presidentit turk, Recep Tayyip Erdogan, për Ramush Haradinajn.
Erdogan, pos tjerash, ka pyetur Haradinajn: “Udhëzimet e kujt ju bënë merrni këtë hap? Kur keni filluar të mbroni ata që organizojnë puç kundër Republikës së Turqisë?”, raporton Anadolu Agency.
I pyetur nga Klan Kosova, këshilltari i Haradinajt dhe i ngarkuari për bisedime me Serbinë në Bruksel, Avni Arifi, ka thënë se nuk mund të japë një koment rreth kësaj çështje, pasi ende nuk e di saktë se çfarë ka ngjarë.
I vetmi nga qeveria që ka komentuar deklarimin e Erdoganit ka qenë Besnik Tahiri.
I emëruar ditë më parë koordinatori Nacional për Reforma Shtetërore, ka shkruar në llogarinë e tij në Facebook se “Ramush Haradinaj nuk mund të shantazhohet e as kërcënohet, këtë e dinë të gjithë por nuk dëshirojnë ta pranojnë”.