Zëvendësministëri i brendshëm i Maqedonisë, Agim Nuhiu, ka thënë se autoritetet maqedonase iu janë përgjigjur thirrjes së Policisë së Kosovës për të kërkuar dy zyrtarët policor të zhdukur pas aksidentit në Lepenc.
Ai ka pranuar se policia kufitare ka arritur të monitorojë përgjatë lumit Lepenc në territorin maqedon, ndërsa ka theksuar se ka një pistë që mund t’i çojë ata tek dy trupat e policëve të zhdukur.
”Policia kufitare e Maqedonisë iu është përgjigjur thirrjes së Policisë së Kosovës për të monitoruar përgjat lumit në fjalë në territorin maqedon”, ka thënë Nuhiu, për Klan Kosova.
”Por gjatë lumit është parë një barrikadë, pemë e rënë, në të cilën dyshohet se përmes saj ka arritur depërtimi i zyrtarëve ku mund të ndodhen trupat policor të cilët po i kërkojmë”.
”Jemi të gatshëm për të vazhduar më tutje për kërkimet, por për shkak të territ kërkimet do të vazhdohen nga mëngjesi i së hënës” , tha ai.
