Ministria austriake e Mbrojtjes paralajmëron se Ballkani Perëndimor paraqet rajon për rekrutim dhe bazë logjistike të xhihadistëve në Evropë.
Në raportin për gjendjen aktuale të sigurisë të 14 shtatorit, analistët e Ministrisë së Mbrojtjes të Austrisë tregojnë fotografi shqetësuese, veçanërisht kur bëhet fjalë për Bosnjë e Hercegovinën, raporton gazeta austriake heute.at.
“Problemi me islamizmin në Ballkanin perëndimor reflektohet në bazë të lidhshmërisë përmes diasporës, në hapësirën e BE-së”, thuhet në raport, përcjell albinfo.ch.
Derisa në Kosovë pas arrestimit të liderëve salafistë është vërejtur zvogëlim i aktiviteteve, në Bosnjë e Hercegovinë rritet rreziku nga sulmet terroriste, shtohet në raportin, të cilin e ka publikuar gazeta “heute”.
Personat nga spektri islamik, sipas Ministrisë, formojnë para së gjithash në BeH qendra dhe vende islamike.
Me rritjen e presionit të Shtetit Islamik në Siri dhe Irak rritet edhe rreziku nga sulmet terroriste nga ana e simpatizuesve të kësaj organizate terroriste, si në Ballkanin Perëndimor, ashtu edhe në tërë Evropën, paralajmërojnë analistët nga Ministria austriake e Mbrojtjes.
Austria në Ballkanin Perëndimor është e pranishme me pothuajse 800 ushtarë, 325 në misionin e EUFOR-it në BeH dhe 465 në misionin e KFOR-it.