Edhe vazhdimi i seancës së sotme konstituive ka përfunduar pa zgjedhjen e kryetarit dhe nënkryetarëve. Kjo për shkak se deputetët e PAN-it nuk morën pjesë në vazhdeimin e seancës konstituive.
Kryesuesi i Kuvendit, Adem Mikullovci, bashkë me shefat e grupeve të LAA-it dhe VV-së, u dakorduan që në ora 12:00, të mbajnë një takim me shefat e grupeve parlamentare, në mënyrë që të vendoset për vazhdimin e seancës.
Ndërkaq, PAN ka konfrimuar se vetëm me pajtimin e të gjitha grupeve parlamentare mund të thirret një seancë tjetër për konstituimin e Kuvendit.
Deputetja e PDK-së, Blerta Deliu e pranishme në ndërtesën e Kuvendit, por jo në sallë ku po zhvillohet seanca konstituive, ajo ka zbuluar qëndrimin e PDK-së, duke thënë se janë të vendosur se do të marrin pjesë në seancë vetëm atëherë kur të ketë frymë institucionale
“Ne jemi të vendosur që ta vazhdojmë seancën konstituive atëherë kur të mbërrihet një frymë institucionale”, ka thënë Deliu.
“Jam këtu për të shpalosur qëndrimin e fundit të PDK-së lidhur me seancën e sotme. PDK e ka dëshmuar gjithmonë që është parti institucionale dhe e përgjegjshme, prandaj PDK do të japë maksimumin e saj për të ndërtuar sa më shpejt institucionet dhe për të kthyer vendin në normalitet.
Janë të tjerë ata të cilët për interesa partiake kanë bllokuar institucionet në vitin 2014. Po ashtu qytetarët e dinë mirë kush janë ata të cilët jo vetëm kanë bllokuar institucionet, por edhe i kanë sulmuar ato me gaz dhe zollë. Ne na vjen keq që kryesuesi është instrumentalizuar nga partia e tij. Ne do të marrim pjesë në seancën konstituive pasi që të arrihet një konsensus mes partive politike”, ka thënë Deliu.
Në orën 10:00, PDK ka mbajtur një mbledhje të partisë, në të cilën gjithashtu u tha se u diskutua edhe për zgjedhjet lokale.
