Pastorët, Victor Bet Tamraz, Amin Afshar Naderi dhe Hadi Asgari, janë dënuar në mes të 10 dhe 15 vjetëve burgim për një numër akuzash duke përfshirë “drejtimin e aktiviteteve ungjillore dhe atyre të kishave nëpër shtëpi”, kanë thënë ekspertët e pavarur përmes një deklarate.
Këta persona pritet të paraqiten më 4 shkurt para Gjykatës Revolucionare të Iranit, e cila ka fuqi të mbyllë rastin, të konfirmojë dënimet apo të dërgojë rastin në Gjykatën Supreme.
Ekspertët e OKB-së për situatën e të drejtave të njeriut në Iran, së bashku me ekspertët për lirinë fetare kanë thënë se akuzat dhe dënimet janë “në kundërshti të plotë” me oligimet e Iranit sipas ligjit ndërkombëtar.
“Ne jemi të shqetësuar për mungesën e qasjes në kujdesin shëndetësor për këta persona derisa janë të ndaluar, sidomos për gjendjen shëndetësore të Asgarit që tani është në burg”, kanë thënë ata.
“Anëtarët e minoritetit të krishterë në Iran, sidomos ata që janë konvertuar në këtë besim janë duke u përballur me diskriminim dhe persekutim fetar”, kanë thënë ata.
Ekspertët po ashtu i kanë bërë thirrje qeverisë që menjëherë të lirojë të gjithë ata persona që janë arrestuar apo ndaluar sepse kanë ushtruar të drejtën e tyre për liri apo besimin në fenë që kanë zgjedhur.