Presidenti i Turqisë Recep Tayyip Erdogan është takuar me krerë të fshatrave dhe lagjeve (muhtar) nga rajone të ndryshme të Turqisë në Mbledhjen e 36-të të Krerëve të Lagjeve dhe Fshatrave që u organizua në rezidencën presidenciale.
Ai tha se në Turqi tanimë nuk ka ngelur mundësia që shtetit t’i shkaktojë shqetësime asnjë person që kundërshton vlerat, historinë dhe kulturën e popullit.
“Me këtë sistem nuk ka mundësi që të rrezikohet stili i jetesës së asnjë grupi etnik apo fetar. Kjo sepse në periudhën e re, pronari i shtetit do të jetë vetë populli, e jo ky apo ai institucion. Populli tani do ta ketë mundësinë që t’i dalë zot demokracisë, lirisë dhe së ardhmes përmes presidentit dhe kuvendit të cilin e ai e mban nën inspektim. Ky ndryshim nuk është reformë e nxituar, por, përkundrazi, është reformë e vonuar”, tha presidenti Erdoğan.
Ndërkohë, duke folur edhe në lidhje me uljen në 18 vjet të moshës për zgjedhje, Erdoğan tha: “A ka detyrë më të rëndësishme se të shërbesh në parlament? Të rinjtë tanë do t’i shërbejnë atdheut dhe popullit në parlament”.
Erdogan ka shprehur besimin se në lidhje me këtë çështja qeveria do të bëjë ndryshimin e duhur pas referendumit.