Deputeti i Aleancës për Ardhmërinë e Kosovës, Daut Haradinaj tha të martën se ka tendenca që përmes liderit të AAK-së, Ramush Haradinaj të destabilizohet Kosova, por siç tha ai AAK nuk do ta lejojë një gjë të tillë.
Deputeti Haradinaj këto komente i bëri në një ligjëratë në kolegjin “ISPE”.
“Unë e përsëris edhe njëherë që ka tendenca që përmes Ramushit me destabilizua Kosovën dhe ne Aleanca nuk po e lejojmë këtë”, tha Haradinaj.
Deputeti foli edhe për proceset tjera në vend.
Ai tha se në Kosovë ka një bllokadë të funksionimit të institucioneve por jo për fajin e opozitës.
“Kemi një bllokadë dhe kjo bllokadë nuk është për shkak të opozitës, por për shkak të pozitës sepse nuk mundet me u bllokua nga opozita me 37 deputetë dhe si mund të zgjidhet kjo vetëm që të shkojmë në zgjedhje”, ka thënë ai.
Ai tha se pa votat e Listës Serbe nuk ka mundësi të transformohet FSK përmes ndryshimeve kushtetuese.
