Lideri i Lidhjes Demorkatike të Kosovës, Isa Mustafa nëpërmjet një postimi në Facebookun e tij është shprehur taksa duhet të hiqet pa u vendosur reciprociteti.
Mustafa është shprehur se heqja e tarifës është kusht për rifillimin e dialogut për marrëveshje me Serbinë – gjë që po kërkohet nga SHBA dhe BE, shkruan lajmi.net.
Mustafa është shprehur se tarifa është instrument i parëndësishëm aktualisht kur SHBA-të kanë garantuar se nuk do të ketë shkëmbim territoresh midis Kosovës dhe Serbisë, ndërsa ka shprehur se në realpolitikën aktuale rëndësia themelore është partneriteti me SHBA-të.
Lideri i LDK-së ka qenë i prerë duke thënë se Kosova duhet ta heqë tarifën në mirëbesim me SHBA-të dhe BE-në, por se edhe BE-ja duhet ta heqë “tarifën e izolimit “për qytetarët e Kosovës.
Ani pse ky qëndrim i Mustafës është kundër atij të kryeministrit Kurti, ai pret bashkëpunim të ngushtë me VV-në si partnerë të koalicionit, por ka theksuar gjithashtu edhe rolin e opozitës, ku ka kërkuar bashkërendim të forcave politike.
Ky është postimi i tij i plotë:
Qytetarë të nderuar,
Nga SHBA dhe BE po kërkohet fillimi i një procesi të ri të dialogut për Marrëveshjen Përfundimtare me Serbinë. E si kusht i kësaj, heqja urgjente e tarifës për mallrat që vijnë nga Serbia dhe Bosna e Hercegovina.
Në Programin Qeverisës të harmonizuar me Lëvizjen Vetëvendosje jemi orientuar për heqjen e tarifës dhe zbatimin e masave reciproke me Serbine, për çfarë nuk janë përcaktuar modalitetet e reciprocitetit dhe renditja e hapave.
Në situatën aktuale të realpolitikës është e rëdësisë themelore të ruhet dhe të kultivohet partneriteti me SHBA-të dhe të vlerësohet roli prijës i tyre në këtë proces. Jam shumë i bindur se vetëm me SHBA-të mund të përmbyllet Marrëveshja Përfundimtare me Serbinë. Për më tepër kur i dërguari special i Presidentit Trump, Richard Grenell u shpreh se SHBA-të nuk parashohin shkëmbim të territorit. Kjo edhe e bënë tarifën instrument të parëndësishëm të preventimit të dialogut për territorin.
Poashtu duhet të vlerësohet roli i BE-së në këtë proces dhe i përfaqësuesit të lartë, z. Borell. Për aq sa duhet të vlerësohet pritja e drejtë e qytetarëve të Kosovës që ata të trajtohen nga BE si qytetarë evropian dhe se do tu hiqen prangat e lëvizjes së lirë përmes liberalizimit të vizave si rezultat edhe i këtij procesi. BE dhe shtetet e caktuara duhet të heqin paragjykimet ndaj Kosovës, sepse izolimi është një tarifë e skajshme e BE-së ndaj qytetarëve të Kosovës.
Aktualisht vërehet qartë se procesit të dialogut po i japin dinamikë dhe fuqi të veçantë SHBA-të në personalitetin e fuqishëm të Ambasadorit Grenell.
Kosova, për bindjen time, ka nevojë të shfrytëzoj këtë situatë për të përmbyllë dialogun me Serbinë. SHBA-të kanë qenë lidere të pavarësisë së Kosovë. SHBA-të mund të jenë lidere efektive të përmbylljes së problemeve që i kemi me Serbinë dhe e një politike për ringjallje ekonomike të Kosovës.
Thënë shkurt, asnjë tarifë dhe asnjë reciprocitet nuk matet me peshën e partneritetit, sidomos me SHBA-të por dhe me BE-në
Për këto arsye, vlerësoj se:
Kosova duhet të heq tarifën, në mirëbesim me SHBA-të dhe BE-në;
Kosova duhet të njohtojë partnerët tanë për të gjitha pengesat ekonomike, tregtare dhe politike, të cilat në periudhën në vazhdim duhet ti heq Serbia dhe Bosna dhe Hercegovina, në mënyrë që pengesat reciproke të jenë zero;
Vendet e BE-së do duhej të hiqnin “tarifën e izolimit” të qytetarëve të Kosovës”
Nëse Serbia, në kohën që ne e bashkërendisim me mirëkuptim me partnerët tanë , nuk eviton pengesat, atëherë Kosova duhet aktivizon masat e reciprocitetit.
Rezultati që ne duhet të synojmë është njohja reciproke, e cila përfundimisht zgjidhë edhe problemet e bashkëpunimit ekonomik dhe tregtar me Serbinë dhe krijon ambient të sigurt dhe pozitiv për investime të jashtme, për punësim dhe prosperitet ekonomik.
Konsideroj se na ndihmon bashkëpunimi i ngushtë me VV-në, si partnerë të koalicionit, dhe marrja e përgjegjësive të përbashkëta që ta menaxhojmë këtë proces duke u bërë kjo Qeveri prijetare e zgjidhjes në kohën e duhur.
Opozita gjithëherë ka kërkuar rol të fuqishëm të SHBA-së dhe efikasitet të BE-së. Në horizont është edhe njëra edhe tjetra.
Ia vlen të jemi bashkë dhe të bëjmë zgjidhje për Kosovën! IM.
