Pas ndalesës në selinë blu pak ditë më parë, artisët që protestojnë kundër shembjes së Teatrit Kombëtar, janë pritur sot në një takim nga kryetarja e LSI, Monika Kryemadhi.
Ajo i ka shprehur mbështetjen maksimale për kauzën e tyre duke theksuar se është arti, që na ka nxjerrë faqebardhë në Europë, ndaj duhet të ndalim shkatërrimin e tij nga duart e Edi Ramës.
“Mua më kanë në rresht të parë. Kur të vijnë ruspat për të prishur Teatrin Kombëtar, që e ngriti Italia fashiste, por po tenton ta prishë ky regjimi ynë fashist”, u shpreh Kryemadhi.
Kryetarja e LSI bëri thirrje për ndërgjegjësimin e rinisë që të ruajmë këtë vepër, të cilën na e kanë trashëguar.
“Ndihemi të revoltuar, pasi përveçse politikane, jemi spektatorë, teleshikues dhe qytetarë ,ndaj duhet të mbrojmë vendin ku do ta shijojmë teatrin. Jemi jo vetëm për mos shembjen e tetarit, por për një ligj më të mirë për artistët dhe më shumë investime në art”, deklaroi ajo.
Në këtë takim, kryetarja e LSI-së komentoi edhe procedimet e nisura nga Policia dhe Prokuroria për bllokimin e rrugëve gjatë protestës së të enjtes së shkuar.
“Mua nuk më shqetëson fare procedimi penal, kur të bëjmë dekriminalizmin do ta deklarojmë se jemi proceduar nga prokuroria e Ramës. Mua më gjykojnë vetëm shqiptarët dhe me gjykojnë me votë. Ashtu si kam hyrë 17-vjeç në politike, ashtu do të dal, me votën e shqiptarëve. Nuk kërcënon dot as Rama, as Arta Marku, as Xhafaj”,deklaroi Kryemadhi, duke shtuar se është e vendosur për të vazhduar protestën.