Kryeministri i Kosovës, Isa Mustafa, priti në takim ministrin e Punëve të Jashtme të Shqipërisë, Ditmir Bushati, i cili po qëndron në Kosovë me rastin e pjesëmarrjes në Konferencën e Katërt të Ambasadorëve të Kosovës.
Sipas një njoftimi, gjatë takimit, u bisedua për marrëdhëniet bilaterale ndërmjet dy shteteve, për bashkëpunimin në politikën e jashtme si dhe për mbështetjen e mëtejme të Shqipërisë për fuqizimin e subjektivitetit ndërkombëtar të Kosovës.
Në njoftim thuhet se kryeministri Mustafa foli për progresin e Kosovës në politikën e jashtme, duke veçuar të arriturat në fushën e integrimeve, hapjen e kapitullit të ri të bashkëpunimit me NATO-n, anëtarësimin në organizata të ndryshme politike, sportive, rajonale e ndërkombëtare.
“Tani, një fokus i veçantë do t’i kushtohet diplomacisë ekonomike dhe angazhimit për forcimin e shkëmbimeve ekonomike si dhe tërheqjen e investimeve të huaja të cilat do të mundësohen edhe nga Ligji për Investime Strategjike”, citohet të ketë thënë kryeministri Mustafa.
Ndërkaq, po sipas njoftimit, ministri i Punëve të Jashtme i Shqipërisë, Ditmir Bushati, vlerësoi të arriturat e Kosovës në politikën e jashtme, duke shprehur përkrahjen e mëtejme të Shqipërisë në fuqizimin e subjektivitetit ndërkombëtar të Kosovës.
“Ministri Bushati foli edhe për mundësitë e thellimit të mëtejmë të bashkëpunimit ndërmjet diplomacive të dy vendeve”, thuhet në fund të njoftimit.
