Ministri i Infrastrukturës, Pal Lekaj, ka thënë se pas reshjeve të borës, rrugët e Kosovës janë të kalueshme dhe se disa nga to i ka inspektuar personalisht.
“Bora e mbrëmshme përveç se ka zbardhë tokën nuk e ka bërë ndonjë segment rrugorë të pakalueshëm”, ka shkruar Lekaj, në një postim në Facebook.
Sipas tij, Ministria e Infrastrukturës, i ka angazhuar të gjithë drejtorët që të jenë në krye të detyrës dhe bashkë me kompanitë përgjegjëse për mirëmbajtjen e rrugëve të mos lejojnë asnjë “befasi” e cila mund t’iu shkaktojë probleme qytetarëve gjatë lëvizjes së tyre në komunikacion.
“Të gjitha rrugët që janë nën përgjegjësi të ministrisë janë të kalueshme. Në rrugët kodrinoro -malore është intervenuar, si në akset rrugore Pejë – Kullë, Pejë – Rugovë, Kaçanik – Hani i Elezit ka pasur erodime (rrëshqitje) të gurëve të cilët janë pastruar, Brezovicë, Prevallë, Glloboçicë dhe Zhur-Dragash”.
Më tej Lekaj, ka thënë se “është intervenuar dhe po vazhdon puna në largimin e drujve të rrëzuar nga erërat e fuqishme në drejtimet, Dragash-Restelicë, Dragash – Brod dhe Dragash – Zaplluzhë”.
“Bora sjell pastërti, nuk do të lejojmë që të bëhet pengesë për njerëzit”, ka shkruar Lekaj.
