Në Gjykatën Themelore në Prishtinë, të hënën ishte paraparë të mbahet seanca gjyqësore ndaj të akuzuarve Naser Osmanit, Melita Ymeraga, Shkëlzen Lluka, Naim Avdiu Agron Kamberi, Adrian Kelmendi e Agim Deshishku, të cilët akuzohen për keqpërdorim të detyrës zyrtare lidhur me privatizimin e fabrikës “FAN” në Podujevë.
Në seancën e së hënës, ishte paraparë të jepej dëshmia e dëshmitarit Haxhi Arifi, por që e njëjta është shtyrë me kërkesën e të akuzuarit Naser Osmani, pasi ka munguar mbrojtësi i tij, avokati Berisha.
Kryetari i trupit gjykues Shashivar Hoti, e pyeti të akuzuarin nëse pajtohet për të vazhduar seanca pa prezencën e mbrojtësit të tij, por i akuzuari Osmani, nuk është pajtuar të dëgjohet dëshmitari Arifi, pa qenë prezent edhe avokati i tij.
I akuzuari Naser Osmani, tha se mbrojtësi i tij i kishte thënë se sot nuk do të jetë i pranishëm në këtë seancë, po ashtu edhe kryetari i trupit gjykues Shashivar Hoti, tha se nuk ka pranuar ndonjë njoftim nga avokati Berisha, që nuk do të prezanton në këtë seancë.
Pas konsultimit, trupi gjykues mori vendim që kërkesa e të akuzuarit Naser Osmani të pranohet dhe seanca të shtyhet për 16 tetor 2017, me fillim nga ora 9:30.
Ndryshe, rasti kundër Naser Osmanit kishte filluar sipas kallëzimit penal të parashtruar nga Policia e Kosovës më 28 prill 2014. Prokuroria Speciale e Republikës së Kosovës më 30 prill 2014, kishte marr aktvendim për fillimin e hetimeve, kurse kjo Prokurori më 16 shkurt 2016, kishte ngritur aktakuzë kundër deputetit Naser Osmani, nënkryetar i Bordit të Drejtorëve të AKP-së, Bahri Shabani, Shkëlzen Lluka, Naim Avdiu, Melita Ymeraga, Agron Kamberi, Adrian Kelmendi, Agim Deshishku, të gjithë zyrtarë në AKP.
Sipas aktakuzës së ngritur nga ana e PSRK-së, të akuzuarit Naser Osmani, si nënkryetar i Bordit të Drejtorëve të AKP-së, Bahri Shabani si drejtori i Bordit të AKP-së, Shkelzen Lluka si menaxher i AKP-së, Naim Avdiu si zv/drejtor menaxhues i AKP-së dhe Melita Ymeraga, Ardian Kelmendi, Agron Kamberaj, si kryesues të Njësisë së Monitorimit në AKP në bashkëpunim me zyrtarët e tjerë si anëtarë ndërkombëtarë të AKP-së: Lisa Brodey, Mohammed Omran dhe Hubert Wrsmann, i kanë kaluar kompetencat zyrtare me qëllim të përfitimit të kundërligjshëm të dobisë për vete ose për personin tjetër, në vlerë prej 5,400,000,00 euro.
Ata akuzohen se kanë shkelur të drejtat e punëtorëve të kësaj ndërmarrje, me çka njëkohësisht i kanë shkaktuar dëm Ndërmarrjes Shoqërore “FAN” e përfaqësuar nga AKP-ja si dhe buxhetit të shtetit, lidhur me çështjen e Ndërmarrjes së Re “FAN-Podujevë”. Kjo e fundit, ishte privatizuar në valën e 7-të të shitjes nga AKM-ja, ku ishte blerë me çmim prej 2,310,000 euro nga blerësi, që më pas i akuzuari Agim Deshishku, sipas kontratës së nënshkruar me zotimet e fituara të bëjë investime në vlerë prej 2,800,000 euro dhe të punësojë 236 punëtorë gjatë periudhës dy vjeçare.
Në seancën e shqyrtimit fillestar të mbajtur më 4 prill 2016, pas leximit të aktakuzës nga prokurori special Admir Shala, të pandehurit Naser Osmani dhe Bahri Shabani, nuk u deklaruan lidhur me fajësinë apo pafajësinë e tyre, me arsyetimin se prezent duhet të jenë të gjithë anëtarët e bordit. Shqyrtimi i dytë lidhur me këtë rast ishte caktuar të mbahej më 6 maj 2016, por e njëjtë ishte shtyrë. Që nga 6 maji 2016, e deri në fund të shkurtit 2017 nuk është mbajtur asnjë seancë tjetër lidhur me këtë rast.
Kjo aktakuzë, tani, do të përfaqësohet nga prokurorja speciale Fikrije Fejzullahu, pasi ish-prokurori special, Admir Shala, është zgjedhur kryeprokuror i Prokurorisë Themelore në Prizren.
