Mbështetja nga bizneset për ushtrinë me produkte ushqimore apo veshmbathje dhe çështje të tjera, ishin qëllimi i takimit në mes të Odës së Afarizmit të Kosovës dhe Ministrisë së Mbrojtjes së Kosovës.
Kjo është bërë e ditur përmes një njoftimi për media.
Kryetari i Bordit të Odës së Afarizmit të Kosovës Skënder Krasniqi përgëzoi Ministrin e Forcës së Sigurisë së Kosovës, Rrustem Berisha për formimin e Ushtrisë, duke ofruar bashkëpunim dhe përkrahje në çdo fushë ku shihet e nevojshme në mes FSK-së, OAK-së dhe bizneseve, raporton lajmi.net.
Hysni Zogaj anëtar i bordit në OAK, falënderoi Ministrin për takimin, uroi për formimin e ushtrisë dhe theksoi si çështje shumë të rëndësishme futjen e lëndës ‘Mbrojta dhe Siguria’ në planprogramin universitar publik dhe në atë privat. Gjithashtu theksoi se OAK është e gatshme të ofroj çdo ndihmë që FSK ka nevojë nga ana e bizneseve çoftë me produkte ushqimore apo veshmbathje.
Sekretari i bordit të OAK-së, Diamant Elshani propozoi që të rregullohet Ligji i Prokurimit Publik në mënyrë që të stimulohen prodhimet vendore me kualitet të lartë.
Në takim ishin të pranishëm edhe përfaqësuesit e biznesve anëtare të Odës, Afrim Berisha nga Qumështorja Bylmeti dhe Qëndrim Kryeziu nga ISP Broadcast, të cilët theksuan se bizneset janë të gatshme të paguajnë një taksë prej 2-3% për ushtrinë e Kosovës.
Kryeziu gjithashtu propozoi që të themelohet një televizion, ku ushtria dhe policia e Kosovës të informojnë qytetarët për aktivitetet e tyre në mbrojtjen dhe sigurinë e qytetarëve.
“Ministri Rrustem Berisha u shpreh i nderuar për vizitën e OAK-së dhe ofrimin e bashkëpunimit nga ana e tyre të cilën e konsideroi si shumë të rëndësishme, ngaqë me formimin e ushtrisë e presin përgjegjësi të mëdha, andaj bashkëpunimi i dyanshëm është i domosdoshëm për tu fokusuar në misionin dhe realizimin e pritjeve të qytetarëve gjatë këtij rrugëtimi”, përfundon njoftimi.
