“Para se të shkoja të votoja, vajta tek parku. Aty bleva 5 gramë hashash”, Klodiana Lala zbardh dëshminë tronditëse të të riut që rrezikoi jetën e dhjetëra qytetarëve në Tiranë

25.04.2021 17:57:01

Një incident i rëndë u shënua mesditën e sotme në sheshin ‘Skënderbej’ në Tiranë ku u vu në rrezik jeta e dhjetëra qytetarëve.

Gazetarja Klodiana Lala ka siguruar dëshminë e 32-vjeçarit Arben Memia i cili u fut në shesh me makinë dhe tentoi të shtypë qytetarët.

“Para se të shkoja të votoja, vajta tek parku, aty bleva 5 gramë hashash, 2 i kam pirë menjëherë”, mësohet të jetë shprehur i riu në polici.

Ditën e djeshme, 32-vjeçari ka marrë një makinë me qira në Kamëz, e ditën e sotme kishte shkuar për të votuar në Kombinat, aty ku kishte dhe QV e tij.

Më pas, ai është drejtuar drejt zonës së Yzberishtit në kryeqytet, ku ka përplasur dy makina, ndërsa itinerari i tij ka vijuar me zonën e Freskut.

Edhe në këtë zonë, 32-vjeçari ka përplasur një makinë dhe më pas, nga atje, është drejtuar drejt sheshit “Skënderbej”, ku dhe u neutralizua nga kalimtarët e rastit. Mema ka pretenduar se nuk mban mend asgjë nga çka bërë më parë, ndërsa kujton vetëm momentin ku me makinën e marrë me qira, është gjendur në mes të sheshit.

“Kështu është shprehur Arben Mema 32 vjeçar, që rrezikoi jetën e qytetarëve. Për fat të mirë nuk ka pasur të lënduar. Ai ka marrë ditën e djeshme një mjet me qira në Kamëz, ai do të votonte në Kombinat. Policia e Tiranës ka marrë informacion që një person që me automjet ka përplasur dy makina në zonën e Yzberishtit. Pra ai ka udhëtuar nga Yzberishti në Fresk, ku ka dëmtuar edhe një automjet tjetër. Fatmirësisht nuk ka pasur të lënduar. Ai pretendon se nuk mban mend se çfarë ka ndodhur, vetëm mban mend momentin e Sheshit Skënderbej. Ai thotë se të gjithë panikun që ka shkaktuar, ka qenë i pa përgjegjshëm për shkak të efektit të narkotikëve. Ai ka rekorde të mëparshme, është ndaluar për përdorim të narkotikëve dhe për një aksident. të gjithë strukturat janë duke hetuar ngjarjen dhe fatmirësisht këto incidente kanë kaluar pa të lënduar”, tha Lala.