Një video ku shihen pjesëtarë të një njësie speciale policore, duke rrahur disa persona, ka qarkulluar sot nëpër rrjetet sociale dhe në disa portale duke e përshkruar si incizim që është bërë në Kosovë
Por këtë e ka demantuar Policia e Kosovës duke thënë se pas informimit, kjo video është verifikuar menjëherë dhe e njëjta nuk është incizuar në Republikën e Kosovës, shkruan lajmi.net
“Njerëzit në uniforma që shihen duke ushtruar dhunë ndaj disa qytetarëve brenda në një lokal nuk janë pjesëtar të Policisë së Republikës së Kosovës. Për më tepër është e qartë se as gjuha e cila dëgjohet në video incizim nuk është gjuhë shqipe e as gjuhë e komuniteteve tjera në Republikën e Kosovës”, thuhet në reagim.
Njoftimi i plotë:
Sqarim për media dhe opinionin e gjerë lidhur me një video incizim të publikuar në facebook të quajtur Një komb
Policia e Kosovës, me qëllim të sqarimit dhe informimit të drejtë të opinionit publik lidhur me publikimin e një video incizimi (në facebook të quajtur Një komb) e më pastaj edhe në disa portale tjera, në të cilën pretendohet dhe komentohet se pjesëtar të Policisë së Kosovës ushtrojnë dhunë ndaj qytetarëve në një lokal, ju sqarojmë si në vijim;
Policia e Kosovës (PK) menjëherë ka verifikuar imazhet nga ky video incizim, dhe konstaton se njerëzit në uniforma që shihen duke ushtruar dhunë ndaj disa qytetarëve brenda në një lokal nuk janë pjesëtar të Policisë së Republikës së Kosovës.
Për më tepër është e qartë se as gjuha e cila dëgjohet në video incizim nuk është gjuhë shqipe e as gjuhë e komuniteteve tjera në Republikën e Kosovës (RKS).
Asnjë element i dukshëm tek njerëzit që ushtrojnë dhunë në këtë video siç janë uniforma, emblema dhe mbishkrimi institucional nuk janë dhe nuk i përkasin PK-së.
Gjithashtu edhe nga verifikimet e kryera nuk ka asnjë ankesë ndaj zyrtarëve policor për ndonjë dhunë të ushtruar të kësaj natyre.
Policia e Kosovës vlerëson se qytetarët e Republikës së Kosovës e kanë të qartë seriozitetin, përkushtimin dhe profesionalizimin e këtij institucioni dhe besojmë fuqishëm se nuk do të bien në lajthitje të këtij video incizimi të publikuar në mënyrë tendencioze.
Po ashtu i sigurojmë të gjithë qytetarët e RKS-së, se do të vazhdojmë të jemi të përkushtuar që me etikë të lartë dhe integritet t’iu shërbejmë të gjithë qytetarëve të vendit.
Prandaj, konsiderojmë se opinioni publik duhet të informohet drejt dhe korrekt, se zyrtarë policor të PK-së nuk janë të përfshirë në këtë video incizim të publikuar në facebook të quajtur Një komb, i cili dyshohet të jetë në Shkup të Maqedonisë (bazuar në linkun e publikuar) .
