Policia e Kosovës bëri të ditur se të mërkurën, rreth orës 18:45 në fshatin Llaushë të Podujevës, në brezin kufitar në mes të Republikës së Kosovës dhe Serbisë janë arrestuar dy persona nga autoritetet policore serbe.
Daut Hoxha, zëdhënës i Policisë së Kosovës tha për Telegrafin se këtë rast janë duke e trajtuar përmes kanaleve zyrtare.
Ai tha se sipas informacioneve të deritanishme personave të arrestuar iu janë konfiskuar edhe mjetet/traktorët e tyre.
“Informacioni i pranuar nga Policia e Kosovës ka të bëjë fillimisht me arrestimin e një personi, e më pastaj edhe arrestimin e personit të dytë (m/sh/k) nga autoritet policore serbe. Sipas informacioneve të deritanishme personave të arrestuar iu janë konfiskuar edhe mjetet/traktorët e tyre. Policia e Kosovës është duke e trajtuar këtë informacion/rast përmes kanaleve zyrtare”, njoftoi Policia e Kosovës.
