Qeveria e Republikës së Kosovës edhe mëngjesin e sotëm e ndërroi agjendën e takimit. Ajo u mblodh 45 minuta më herët se sa e kishin paralajmëruar për media.
Në takimin e 103-të të Qeverisë së Kosovës u shqyrtua pika e vetme sipas rendit të ditës: Shqyrtimi i Projektligjit për Ratifikimin e Marrëveshjes për Kufirin Shtetëror ndërmjet Republikës së Kosovës dhe Malit të Zi.
Qeveria e Kosovës e ka argumentuar se pse duhet proceduar sa më shpejtë kjo pikë.
”Prej saj varet liberalizimi i vizave dhe integrimet evropiane. Nëse në të ardhmen paraqitet ndonjë fakte që e dëshmon të kundërtën atëherë Ligji e parasheh që ky proces mund të zgjidhet përmes Arbitrazhit apo përmes marrëveshjes direkte me Malin e Zi”, ka thënë ministri i Punëve të Jashtme, Enver Hoxhaj.
Ndërsa kryeministri i Kosovës, Isa Mustafa, ka thënë se duhet ta procedojmë dhe të punojmë me opinionin.
“Mendoj që duhet ta procedojmë dhe duhet të punojmë me opinionin, se ky vendim është i drejte dhe se kauza e opozitës është e paqëndrueshme. Kush është që ta procedojmë?Në kuvend do ta procedojmë me procedura të rregullta sot marrëveshjen dhe ata vendosin kur do ta mbajnë seancën për demarkacionin”, ka thënë Mustafa.
