Ministria e Shëndetësisë ka nënshkruar Marrëveshje bashkëpunimi dyvjeçare me grupin e spitaleve italiane, i përfaqësuar nga spitali pediatrik “Meyer”, nga Firenca.
Marrëveshja ka për qëllim forcimin e aftësive profesionale të personelit shëndetësor të repartit të Kardiokirurgjisë në QKUK dhe pajisjen me aparaturë.
Një ditë pas nënshkrimit të kësaj marrëveshjeje, sot është shënuar edhe ceremonia zyrtare e dorëzimit të aparaturave në vlerë prej 370 mijë eurosh për Kardiokirurgjinë.
Sipas ministrit të Shëndetësisë, Uran Ismaili, ky është një donacion shumë i çmuar i Qeverisë italiane, që implementohet nga Agjencisë Italiane për Bashkëpunim e Zhvillim, në kuadër të projektit 3-milionësh “Mbështetje për sistemin shëndetësor në Kosovë”.
“Me ardhjen e këtyre pajisjeve është mundësuar hapja e sallës së dytë operative të Kardiokirurgjisë, si dhe sallës së dytë të kujdesit intensiv. Po ashtu, këto pajisje në vlerë prej 370 mijë eurosh, ndihmojnë në rritjen e numrit të shërbimeve për qytetarët tanë, të cilët do të kenë nevojë për trajtimet e sëmundjes së zemrës”, tha ministri Ismaili.
Ambasadori i Italisë në Prishtinë, Piero Cristoforo Sardi, theksoi se kjo është faza e parë e donacionit për aparatura mjekësore në Kardiokirurgji.
Sipas tij, ky bashkëpunim do të vazhdojë edhe më tej me Ministrinë e Shëndetësisë.
”Jemi këtu për të parë nga afër realizimin e një pjese të projektit, që është bërë i mundur nga qeveria italiane. Projekti është rreth 3 milionë euro si donacion me disa pajisje mjekësore në Spitalin e Kardiokirurgjisë në Prishtinë. Falënderojmë ministrin Ismaili për shtyrjen përpara të këtij projekti. Italia do të vazhdojë të ndihmojë edhe në të ardhmen shëndetësinë kosovare”, tha ambasadori Sardi.
Kjo marrëveshje është pjesë e projektit 3 milionësh “Mbështetje për sistemin shëndetësor në Kosovë”, i financuar nga Qeveria italiane nëpërmjet Agjencisë Italiane për Bashkëpunim e Zhvillim.
