Qeveria e Republikës së Kosovës sot ka ndarë 15 mijë euro për familjen e policit Izet Demaj, i vrarë të enjten në komunën e Istogut gjatë një përballjeje me grabitësin e një banke.
Vendimi për ndarjen e kësaj shume është marr sot në mbledhjen e Qeverisë së Kosovës.
Ndryshe, sot kryeministri Ramush Haradinaj ka vizituar Drejtorinë e Përgjithshme të Policisë së Kosovës. Haradinaj, në një deklaratë për media tha se do t’i marrin të gjitha veprimet që policia të ketë mbështetjen e duhur, ndërsa nuk do të lejojnë që kriminelët të bëjnë ligjin në Kosovë.
Haradinaj ka thënë se polici Izet Demaj, ka shti me armë në mbrojtje të vetes dhe rendit, për ta paguar edhe me jetë.
“Dje ka qenë një ditë e ndjeshme dhe e dhimbshme. Dje u vra një polic në detyrë si dhe sulmuesi i involvuar në plaçkitje. Polici ka shti në mbrojtje të vetes, rendit dhe e ka paguar me jetë, si dhe sulmuesi. E falënderoj drejtorin për menaxhimin e gjendjes në ditën e djeshme. Po ashtu i jap përkrahje policisë”, ka thënë Haradinaj, raporton Telegrafi.
Ndryshe, dita e shtunë do të jetë dite zie në Kosovë.
