Sekretari i Përgjithshëm i NATO-s, Jens Stoltenberg ka pritur sot në takim në Selinë e NATO-s në Bruksel, kryeministrin e Kosovës, Avdullah Hoti.
Gjatë këtij takimi u diskutua mbi zhvillimet aktuale në Ballkanin Perëndimor.
“Sekretari i Përgjithshëm Stoltenberg përshëndeti raundin e fundit të bisedimeve të ndërmjetësuar nga BE-ja, në mes Beogradit dhe Prishtinës i cili u zhvillua të hënën në Bruksel, duke nënvizuar se dialogu është mënyra e vetme për të arritur një zgjidhje të qëndrueshme politike në Ballkanin Perëndimor”, thuhet në njoftimin për media.
Stoltenberg dhe Hoti diskutuan gjithashtu për marrëveshjen e arritur në Uashington për normalizimin e marrëdhënieve ekonomike midis Beogradit dhe Prishtinës.
Stoltenberg theksoi se NATO është e vendosur për stabilitetin në Ballkanin Perëndimor përmes forcës paqeruajtëse të KFOR-it me 3.500 trupa në Kosovë.
Avdullah Hoti from Kosovo visits NATO and meets with NATO Secretary General Jens Stoltenberg
Ai shtoi se mandati i KFOR-it mbetet i pandryshuar: të mbajë një mjedis të sigurt dhe të siguroj lirinë e lëvizjes për të gjithë njerëzit në Kosovë, në përputhje me Rezolutën e Këshillit të Sigurimit të Kombeve të Bashkuara 1244 të vitit 1999.
Duke folur për pandeminë COVID-19, Sekretari i Përgjithshëm mirëpriti që Aleatët dhe partnerët e NATO-s tashmë kanë siguruar mbështetje të konsiderueshme mjekësore për të ndihmuar institucionet në Kosovë dhe se KFOR-i gjithashtu po ofron mbështetje të drejtpërdrejtë në shpërndarjen e furnizimeve.
Ai shtoi se NATO tani po shikon se si Aleanca mund të mbështesë më tej Kosovën në luftimin e pandemisë COVID-19.
Duke e vlerësuar rolin e Aleancës Veriatlantike për paqen dhe stabilitetin ndërkombëtar, kryeministri Avdullah Hoti theksoi përkushtimin e Kosovës për ndërtimin e një të ardhmeje euroatlantike dhe synimin që Kosova sa më parë të bëhet anëtare e NATO-s. Në fund të këtij takimi, kryeministri Hoti e ftoi Sekretarin Stoltenberg të vizitojë Kosovën, sa më parë që t’i jepet rasti.
