Presidenti Hashim Thaçi ka dalë në konferencë të përbashkët me përfaqësuesin special të Bashkimit Evropian, Miroslav Lajcak. Ai thotë se ardhmja e Kosovës është në familjen evropiane, ndërsa tregon se i ka theksuar Lajcakut vonesën në liberalizimin e vizave për Kosovën.
Pas shumë kritikave për Bashkimin Evropian, Thaçi ka thënë se ardhmja e Kosovës duhet të jetë kjo familje.
Presidenti thotë se pret nga pesë shtetet e BE -së që nuk e kanë njohur Kosovën, përfshirë edhe Sllovakinë e Lajcakut, ta njohin atë.
“Kosova e ka një të ardhme dhe alternativë të vetme anëtarësimin në familjen evropiane. Në të njëjtën kohë presim vendet mike që e kanë përkrahur dokumentin e Ahtisaarit, që ta njohin Kosovën”
Thaçi ka treguar se me përfaqësuesin e BE’së kanë folur për dialogun e Kosovës me Serbinë.
“Në anën tjetër, diskutuam për angazhimet e drejtpërdrejta që do t’i ketë z. Lajcak në negociatat me Serbinë. Çdo përpjekje që çon në normalizim të raporteve dhe njohje është e mirëseardhur. Dua të besoj se do të ketë veprime konkrete”
Thaçi thotë se i ka kërkuar Lajcakut që sa më shpejt që t’i liberalizohen vizat kosovarëve dhe të mos e zgjasin pambarim këtë proces.
