Një polic i burgjeve do të hetohet për shpërdorim detyre pasi dyshohet se nuk e ka dërguar në kohë në spital të dënuarin 49-vjeçar, i cili ndërroi jetë në spitalin e Krujës.
Sipas mjekëve i burgosuri F.A., nga Pogradeci, që vuante dënimin në Burgun e Zaharisë, ka ndërruar jetë dje pasdite.
Policia sqaron se 49 – vjeçari ishte dërguar në spital pasi kishte shfaqur probleme kardiake në qeli.
Mjekët kanë konstatuar se pacienti kishte mbërritur me vonesë në duart e tyre dhe se një ndërhyrje më e shpejtë e autoriteteve të burgut për ta dërguar në spital mund t’i kishte shpëtuar jetën.
Uniformat blu kanë nisur një procedim penal ndaj D.C., 37 vjeç, me detyrë punonjës policie i regjimit të brendshëm në burgun e Zaharisë.
Materialet hetimore iu referuan Prokurorisë së Rrethit Gjyqësor Krujë pasi punonjësi i burgjeve mund të ketë “shpërdoruar detyrën”.
D.C. kishte detyrë vëzhgimin e të burgosurit me mjekim të detyrueshëm, pasi vuante nga probleme shëndetësore.