Nxënësit e shkollës 9-vjeçare “Kolë Jakova” kanë mbjellë 70 pemë selvie në oborrin e shkollës së tyre, duke i ndryshuar kështu pamjen.
Kryebashkiaku Erion Veliaj dhe Lorik Cana ishin në këtë shkollë ku mbështetën nismën e fëmijëve, dhe Veliaj shprehu mirënjohjen që fëmijët iu bashkuan kësaj nisme, duke theksuar se angazhime të tilla janë demonstrimi më i mirë se ata do jenë qytetarë shumë të mirë nesër.
“Revolucion i gjelbër i Tiranës po shkon, jo vetëm në sheshin “Skënderbej”, jo vetëm te Parku i Liqenit apo në rrugët kryesore të qytetit, por edhe këtu, në rrugën e fundit që ndan Tiranën me Kamzën. Jam shumë i lumtur që na janë bashkuar fëmijët më të mirë të qytetit tonë sepse ai që është i mirë, është i mirë në të gjitha: edhe del me dhjeta, edhe mbjell pemë, edhe është një qytetar i angazhuar”, tha ai.
Pemët u dhuruan nga organizata “World Vision”, e cila operon në zonën e Bregut të Lumit. Ajo dhuroi për Njësinë Administrative nr. 11, 70 pemë selvi, duke u bërë pjesë e revolucionit të gjelbër që po përjeton Tirana dhe për të inkurajuar çdo qytetar, sidomos të rinjtë, për të respektuar natyrën dhe të përfshihen në nisma vullnetare në dobi të komunitetit.
