Ka kaluar një vit që kur dy fëmijë të familjes Mramori në Kolovicë humbën jetën tragjikisht në këtë pus të hapur nga një kompani private. Për këtë rast, babai i fëmijëve, Muhamet Mramori, kishte paditur Komunën e Prishtinës dhe pronarin e tokës ku punohej në atë kohë.
Mirëpo, deri tash nuk ka marrë as edhe një ftesë nga Gjykata Themelore e Prishtinës.
I zhgënjyer me organet e drejtësisë është edhe avokati i familjes Skënder Musa, sipas të cilit gjykata po e neglizhon rastin.
Madje avokati mbrojtës dyshon se as hetimet lidhur me vdekjen e dy fëmijëve nuk kanë filluar fare nga institucionet përgjegjëse, duke thënë se fillimisht është dashur të thirret pala e dëmtuar për ta sqaruar rastin, gjë që ende nuk ka ndodhur. RTK ka provuar të marrë një përgjigje edhe nga Gjykata Themelore e Prishtinës, por këta të fundit nuk i janë përgjigjur.
Ndërkohë, babai i dy fëmijëve të vdekur, tregon se ditët në këtë familjeje po kalojnë me vështirësi, marrë parasysh vajzën e tyre që mbeti e vetme, e cila nuk e kishte të lehtë ta kalonte pikëllimin e përjetuar para një viti, ku para syve të saj mbetën të vdekur motra dhe vëllai.
Pesha e kësaj tragjedie bëhet edhe më e rëndë kur familja përballet edhe me probleme ekonomike.
Familja ka pritur se do jetë përfituese e një banese, të cilat i ka ndarë komuna e Prishtinës, por kjo nuk ka ndodhur. Mirana Mullafazliu tha se banesat sociale u janë dhënë atyre familjeve që i kanë plotësuar kriteret e kërkuara.
