Tanimë, kur bota i është shembur nën këmbë, me karakterin e fortë të një shkodrani, Benjamin Havizi, babai i gjyqtares së vrarë nga ish-bashkëshorti, Fildes Hafizi, përcjell një mesazh për gratë dhe vajzat që jetojnë nën terrorin e dhunës së bashkëshortëve.
“U bëj thirrje të gjithë grave, të gjitha vajzave, të gjitha nënave. Bëhuni trime dhe mos pranoni. Ai që e rreh gruan, ai që vret gruan është mashkulli më i poshtër. Jo mashkull, nuk duhet me quajt mashkull. Kafsha më e poshtër e shoqërisë njerëzore”, thotë ai.
Në një pallat të vjetër, familjarë dhe të njohur të gjyqtares së Shkodrës vijnë për të ngushëlluar prindërit dhe dy fëmijët e saj. Arlindi dhe Melissa e quajnë shtëpia e lirisë, pavarësisht kushteve dhe varfërisë ku jetojnë pas divorcit të së ëmës.
“Unë dhe Arlindi nuk ia kemi ditur kurrë kuptimin fjalës babë. Ashtu ka qenë ai gjithmonë, nuk na njihte. Para ca kohësh isha vetëm me atë dhe po më bërtiste në lidhje me mamin. Mund të ketë qenë e vetmja kohë kur ka treguar psikopatinë e tij përpara nesh dhe ka qenë gjëja më e frikshme e jetës sime. Unë qaja dhe ai qeshte që qaja unë”, shprehet e bija Melisa.
Për më shumë, shikojini videot.
