Në koordinim me grupet parlamentare janë tejkaluar dallimet mes subjekteve parlamentare në Maqedoni, ku kanë rënë dakord me përbërjen e Komisionit për Emërime dhe Zgjedhje, komision që do të udhëhiqet nga VMRO-DPMNE-ja.
Grubi tha se mbledhja konstitucionale e Kuvendit të Maqedonisë, e ndërprerë më 30 dhjetor 2016, do të vazhdojë të hënën.
Pas konstituimit të Kuvendit do të procedohet me zgjedhjen e kryetarit të tij. Mediet në rajon shkruajnë se, përmes burimeve të ndryshme është mësuar edhe emri i kryetarit të ardhshëm të Kuvendit të Maqedonisë, e duket se bëhet fjalë për deputetin Talat Xhaferi.
Ndërsa presioni perëndimor rritet gjithnjë e më shumë mbi Maqedoninë për të formuar institucionet dhe për t’i dhënë fund krizës, BDI-ja dhe LSDM-ja vendosën që të vijojnë procedurat për të anashkaluar presidentin Ivanov dhe për të vazhduar me krijimin e Kuvendit.
Më herët, në kuadër të krizës që ka përfshirë Maqedoninë dhe në formë përgjigjeje ndaj pretendimeve perëndimore se Moska është një prej faktorëve, ministri i Jashtëm i Rusisë, Sergei Lavrov deklaroi se shpreson që vendet perëndimore të kuptojnë rrezikun e përpjekjeve për të destabilizuar situatën në Maqedoni.
Sipas tij, kriza është krijuar në shumë aspekte artificialisht nga Perëndimi, që po sjell përpjekje për të përçarë shoqërinë në Maqedoni.
