“Një nga rekomandimet kryesore të ODIHR-it nga zgjedhjet e 4 vjetëve më parë ishte se në Vendet e Numërimit të Fletëve të Votimit vëzhguesve duhet t’u jepet mundësia të ndjekin të gjitha aspektet e numërimit të votave dhe nxjerrjes së rezultateve” – tha ai.
Qytetarët shqiptarë dhe vëzhguesit ndërkombëtarë, tha ambasadori Boschardt kanë denoncuar vazhdimisht praktika korruptive në zgjedhje, ndaj shoqërisë civile i takon një rol qendror në luftën ndaj korrupsionit zgjedhor. Sipas tij, ajo ka rritur vitet e fundit si transparencën e proceseve zgjedhore, ashtu edhe atë të numërimit të votave.
“Në Shqipëri mund të vëzhgohen të gjitha aspektet e një procesi zgjedhor. Megjithatë, vëzhguesit që janë thjesht qytetarë nuk kanë të njëjtat të drejta si vëzhguesit e partive të ndryshme, pasi ata nuk mund të marrin kopje të të dhënave në mbyllje të votimit apo tabelën përmbledhëse të rezultateve apo të paraqesin ankesa në lidhje me zgjedhjet” – tha ai.
Ambasadori Boschardt theksoi se vëzhguesit zgjedhorë janë sytë dhe veshët e publikut në proceset zgjedhore, rojtarët e vërtetë që ndihmojnë në frenimin e mashtrimeve zgjedhore dhe në identifikimin e parregullsive të procesit dhe që me vlerësimin e tyre përfundimtar rezultojnë në fund të jenë zëri i qytetarëve.
OSBE shprehu besimin se vëzhguesve do t’u jepen më shumë të drejta edhe me ndryshime ligjore, dhe e nxiti KQZ-në të marrë të gjithë hapat e nevojshëm për zgjedhjet e 25 qershorit për të garantuar një vëzhgim të plotë të procesit të numërimit.