Na ndajnë pak më shumë se dy muaj nga dita kur Bashkimi Europian do të vendosë për të hapur ose jo negociatat e anëtarësimit për Shqipërinë dhe Maqedoninë e Veriut dhe mesazhe të forta po përçohen nga Brukseli.
Së fundmi për ccështjen ka folure edhe Përfaqësuesja e Lartë e BE-së, Federica Mogherini, duke theksuar se po pret që vendimi në qershor të jetë pozitiv, duke i hapur negociatat vendit tonë.
Në fjalën e saj në seancën plenare të Komitetit të Parlamentit Evropian për Punët e Jashtme, Mogherini u shpreh se mezi pret që të shohë që në qershor Shqipëria dhe Maqedonia e Veriut të nisin këtë rrugëtim të ri drejt BE-së.
“Kur të shikoni në hartën e Evropës, shihni se Ballkani është në Evropë. Prandaj, në vend të fjalës zgjerim, më pëlqen të them ribashkimin e Ballkanit me Evropën”, tha Mogherini.
Ky optimizëm i Përfaqësueses së Latë të BE vjen në një kohë kur Parlamenti holandez ka votuar pro rikthimit të regjimit të vizave me Shqipërinë, duke ndikuar në përkeqësimin e krizës politike në vend dhe ashpërsimin e diskursit të liderëve Rama dhe Basha.