SHBA’të duan që ta mbrojnë Kosovën nga ekspansioni rus, edhe me ligj. Kështu bëhet e ditur, pasi në Senat po diskutohet draft-ligji për mbrojtjen e Europës juglindore dhe Ballkanit nga ndikimi i Rusisë, shkruan Gazeta Metro.
Siç bëhet e ditur, përveç Kosovës, në këtë mbrojtje do të përfshihen edhe vendet e tjera të rajonit, si Serbia, Polonia dhe vendet baltike.
“SHBA do të përdorin të gjitha elementet e forcës përkatëse, në koordinim me aleatët, në mënyrë që t’i mbrojë nga agresioni rus shtetet e Evropës lindore, por edhe ato euro-aziatike”, thuhet në draft ligjin amerikan.
Draft-ligji është propozuar nga senatori republikan, Bob Corker, dhe ky draft-ligj ashpërson raportin e SHBA-së ndaj Rusisë.
Ani pse ende është në procedurë, përveç senatorit që e ka propozuar, ky draft-ligj gëzon përkrahjen e 26 senatorëve të tjerë.
Siç parashihet, me miratimin e këtij draft-ligji, do të krijohej një kornizë e re ndërshtetërore e cila parasheh stërvitje më të shpeshta në vendet e rajonit. Kjo do të bëhej përmes NATO’s, por edhe me marrëdhënie dypalëshe me shtetet që pritet t’i prekë ky draft-ligj.
