Carmi ka shprehur angazhimin e tij që në kuadër të Universitetit të Prishtinës, UNESCO të hapë Zyrën e Bioetikës, e cila njëherësh do të përgatisë një numër të konsiderueshëm të mësimdhënësve të dalluar për ligjërimin, përkatësisht promovimin e parimeve themelore të etikës.
Ai e njoftoi ministrin Bajrami për rëndësinë e hapjes së kësaj zyre, e cila gradualisht do të aftësojë profesorët për implementimin e projektit që ka të bëjë me promovimin e parimeve themelore të etikës në sistemin edukativo-arsimor. Sipas tij, UNESCO i ka të hapura qendrat e Bioetikës në universitetet e mbi 159 vendeve të botës, anëtare të UNESCO-s.
“Do të jemi të angazhuar që të përzgjedhim mësimdhënësit më të mirë, t`i aftësojmë (trajnojmë) për këtë çështje, njëherësh do t`i inkorporojmë Parimet e Etikës edhe në Kurrikulën e re”, ka thënë ministri Bajrami.
Ministri Bajrami gjithashtu kërkoi mbështetjen e Carmi për anëtarësimin e Kosovës në UNESCO, sepse nga ky anëtarësim, sipas Bajramit, më së shumti do të përfitonin të rinjtë tanë për të qenë realisht bartës të vlerave të multikulturalitetit.
Kosova është anëtare e barabartë në mesin e 124 shteteve të botës që nga gushti i vitit 2015 në UNESCO Chair on Bioethics e cila është një organizatë ndërkombëtare nën ombrellën e UNESCO-s , e themeluar në vitin 2001. Ajo merret me edukimin etik në arsimin e ultë,të mesëm dhe në arsimin e lartë.