Policia e Kosovës pas hetimeve të kryera nga Sektori i Hetimeve të Trafikimit me Njerëz i Drejtorisë për Hetimin e Trafikimit me Qenie Njerëzore, kanë arrestuar 4 persona të dyshuar për trafikim më qenie njerëzore.
Sipas një komunikate të Policisë së Kosovës, të arrestuarit dyshohet se në një lokal në qytetin e Shtimes, ka detyruar tri viktima femra të mitura, të punojnë me qëllim të shfrytëzimit seksual.
Të arrestuarit në këtë rast janë: A.F; RR.M ; F.B; T.L.
Gjatë realizimit të këtij plani policor për arrestimin e të dyshuarve, në cilësi të prova materiale janë konfiskuar: 4 (katër) telefona mobil, 1 (një) sprej OC dhe 1 (një) mjet i prehtë thikë.
Gjithashtu në bashkëpunim me inspektoratin e punës dhe me vendim të prokurorit kompetent është mbyllur lokali i dyshuar në të cilin viktimat kryenin punë të detyruar.
Viktimat e rastit janë trajtuar në bazë të Procedurave Standarde të Operimit për viktimat e trafikimit dhe të njëjtat janë strehuar. Të dyshuarit me vendim të prokurorit dërgohen në mbajtje për 48 orë.