Kështu ka deklaruar analist për çështje ndërkombëtare, Avni Mazreku.
“Çfarëdo krize institucionale, edhe pse ende nuk mund ta kualifikojmë Kosovën që ka krizë institucionale, ndikon negativisht në agjendën që e ka vendi përpara, agjendë kjo shumë e rëndësishme dhe e komplikuar”, ka thënë ai.
Mazreku thotë, se pa konsolidimin e plotë të institucioneve që nënkupton formimin e Qeverisë dhe puna funksionale e Parlamentit te Kosovës nuk mund të bëhet liberalizimi i vizave.
“Për Kosovën në procesin e liberalizimi të vizave janë vendosur dy kritere të cilat nuk mund të plotësohen pa konsolidimin e plotë të institucioneve që nënkupton formimin e Qeverisë dhe puna funksionale e Parlamentit te Kosovës. Këto janë çështje të debatueshme, por edhe është bërë e qartë nga ana e Bashkimit Evropian se agjenda për marrjen e vendimit final për liberalizimin e vizave nuk do të ketë pa ratifikimin e marrëveshjes së demarkacionit të kufirit me me Malin e Zi”, ka thënë analisti.
Çështja e dytë që është jetike për Kosovën, thotë Mazreku, kërkon kompromis nacional, e ky kompromis nacional, sipas tij, arrihet në funksionalizimin e Parlamenti dhe krijimin e një qeverie efektive për krijimin Ushtrisë së Kosovës.
“Në mungesë të Ushtrisë së Kosovës nuk mund të aplikohet në NATO, pra anëtarësimi i Kosovës në Aleancë është esencial siç është edhe anëtarësimi në Bashkimin Evropian, pasi NATO ofron siguri për shtete e saj anëtare. Bërja e Kosovës anëtare e NATO-s do ta zgjidhte një herë e përgjithmonë çështjen e sigurisë që Kosova në këtë shkalë është ende në fazën e zhvillimit”, deklaroi ndër tjera ai.
Tutje, Mazreku potencoi, se Kosova ka dështuar në anëtarësimin e saj në disa organizata të specializuara të Kombeve të Bashkuara siç është UNESCO; lidhet esencialisht me funksionalizmin e institucioneve të saj.
“Kosova ka edhe probleme të tjera, siç është aplikimi i marrëveshjes për stabilizim asociim, është marrëveshje kornizë që e rregullon raportin kontraktual ndërmjet Bashkimit Evropian dhe Kosovës. Andaj mos funksionalizimi institucional e zgjatë listën e problemeve të cilat edhe me funksionimin e rregullt të tyre është vështirë të arrihet shtet-ndërtimi i Kosovës”, ka thënë Mazreku.