Presidenti turk, Recep Tayyip Erdogan e ka quajtur “spiun gjerman” gazetarin e arrestuar Deniz Yucel. Ai punon për një gazetë gjermane.
Komentet e Erdoganit rrisin më tej tensionet në mes të Ankarasë dhe Berlinit.
“Si agjent gjerman, ky person është fshehur për muaj të tërë në konsullatën gjermane”, ka thënë Erdogan më 3 mars. “Ne për një muaj kemi thënë na e dorëzoni atë sepse ai duhet të dalë para gjykatës”, ka shtuar Erdogan.
Marrëdhëniet mes dy shteteve janë tensionuar, pasi Berlini është shprehur i shqetësuar me arrestimet pas tentimit për grusht shteti në Turqi në korrikun e vitit të kaluar.
Protestuesit në mbarë Gjermaninë kanë mbështetur Yucel, gazetari i cili ka shtetësi gjermane dhe turke. Yucel i cili punon si korrespondent nga Turqia për gazetën gjermane Die Welt,. u arrestua më 27 shkurt.
Përveç se e akuzojnë për spiunazh, autoritetet turke kanë thënë se gazetari i arrestuar ka bërë propagandën e grupit të ndaluar në Turqi, PPK-së, si dhe ka mbështetur lëvizjen e klerikut turk, Fethullah Gulen, të cilin Erdogan, e akuzon se qëndron prapa grushtit të shtetit.
