Në këtë takim është biseduar për tema të cilët kanë të bëjnë me migrimin, terrorizmin dhe ekstremizmin e dhunshëm, liberalizimin e vizave si dhe për përfshirjen e Policisë së Kosovës në organizatën Interpol.
Me këtë rast, Gashi falënderoi Qeverinë e Austrisë për mbështetjen e Kosovës në proceset e integrimit euro-atlantik, si dhe për përkrahjen ndaj institucioneve të Kosovës në forcimin e kapaciteteve.
Sipas tij, terrorizmi dhe ekstremizmi i dhunshëm vazhdojnë të mbeten një nga kërcënimet kryesore të sigurisë, duke kërcënuar jo vetëm jetën dhe pronën, por edhe vlerat demokratike dhe vetë mënyrën e jetës së shoqërisë. Qeveria e Kosovës dhe institucionet e saj mbeten të përkushtuara për të dhënë ndihmën e tyre për t’i luftuar këto fenomene.
Gjithashtu, Gashi tha se anëtarësimi i Kosovës në INTERPOL është i domosdoshëm për të garantuar dhe forcuar sigurinë dhe stabilitetin në rajon dhe më gjerë.
Në anën tjetër, Sekretari i Përgjithshëm i Ministrisë të Punëve të Brendshme të Austrisë, Peter Goldgruber konfirmoi mbështetjen e shtetit austriak në përmbushjen e objektivave në proceset e integrimit euro-atlantik.
