Policia e Durrës identifikon njërin nga autorët e grabitjes së karburantit, ngjarjes së ndodhur një dirë më parë në Krujë. Për pasojë është shpallur në kërkim kërkim njëri nga autorët e kryerjes së veprës penale, konkretisht shtetasi B.M. 28 vjeç, banues në fshatin Qerek, Krujë.
Shtetasi i mësipërm, më datë 16 shtator, 2016, rreth orës 01:30, në bashkëpunim me një shtetas tjetër, në aksin rrugor aeroporti i Rinasit-Ura e Gjolës, me skafandra dhe nën kërcënimin e armës, kanë grabitur një pikë shitje karburanti, në pronësi të shtetasit N.V. 51 vjeç, banues në Mallakastër.
Autorët kanë hyrë në kabinën e vendqëndrimit të rojeve dhe shitësve të karburantit, ku kanë thyer me armë zjarri automatik xhamin e derës dhe dritares së kësaj kabine, dhe nën kërcënimin e armës kanë detyruar punonjësit të hapin kasafortën e parave nga e cila kanë marre rreth 300 000 lekë dhe janë larguar me mjetin e tyre motoçikletë e tipit “Lifan”.
Gjatë kryerjes së kontrollit të zonës përreth u gjet i djegur rreth 300 m larg vendit të ngjarjes motori të cilin kishin përdorur autorët, i llojit 50 CC. Nga kryerja e veprimeve hetimore në vendin e ngjarjes dhe provat e mbledhura, ka rezultuar si autor i dyshuar është shtetasi B.M. dhe një shtetas tjetër.
Gjatë kontrollit të ushtruar në banesën e shtetasit B.M., u gjetën dhe u sekuestruan në cilësinë e provës materiale 4 kg lëndë narkotike e dyshuar e llojit kanabis sativa. Policia vijon punën për kapjen e autorit të shpallur në kërkim, identifikimin e autorit tjetër dhe dokumentimin e plotë ligjor të ngjarjes.
Materialet i kaluan Prokurorisë Krujë për veprime të mëtejshme për veprat penale “Vjedhjes me dhunë”, dhe Prodhimi dhe shitja e lëndëve narkotike”.