Ministri i Financave Avdullah Hoti ka zhvilluar konsultimin e parë publik me anëtarët e Odës Ekonomike të Kosovës, për Pakon e Dytë Fiskale.
Ai ka deklaruar se si rezultat i këtij komunikimi mes shtetit dhe biznesve, viti po përmbyllet me rritje ekonomike 4 për qind.
Nga ana e tij, kryetari i Odës, Safet Gërxhaliu, ka thënë se ka qenë ky një vit takimesh të shpeshta me ministrin Hoti dhe ka shprehur gatishmërinë për t’u ndihmuar biznesve edhe në vijim.
Ai po ashtu ka theksuar se po përmirësohet ambienti biznesor në Kosovë dhe ekonomia ngadalë po e merr primatin.
Hoti në fund të takimit ka premtuar se edhe vitin e ardhshëm do të ketë takime të këtilla, me qëllim të arritjes së rezultateve sa më cilësore.
