Para një numri të madh të të pranishmëve, fjalim mbajti dhe pretendenti për kryeministër nga ky subjekt partiak, Albin Kurti, i cili tha se ky ishte tubimi më madhështor që nga Kosova e pasluftës, transmeton Klan Kosova.
Në fjalimin e tij Kurti tutje tha se më 12 qershor nuk do të festohet vetëm 18 vjetori i çlirimit të Kosovës por edhe fitorja e Vetëvendosjes.
”Gjatë këtyre ditëve e kemi shpallur fitoren tonë. Në 12 vjetorin e qeverisjes tonë e 18 vjetorin e çlirimit të Kosovës do festojmë fitoren e Vetëvendosjes. Më 11 qershor, rinia jonë e këto yje në gjithësi që nuk po shihen sot, do shkëlqejnë masivisht”.
”Qeveria jonë do të ketë edhe vizion afatgjatë por edhe masa emergjente. Shumë prej të moshuarve e kanë pensionin nga 75 euro, që i bie që kanë 2.50 euro në ditë, me qeverinë e Vetëvendosjes do të jetë minimalja 150 euro pensioni. Do të kalojmë nga sistemi i financimit në sistemin e solidaritetit. Një në 5 pesë fëmijë jeton në kushte varfërie”.
”Do të japim shtesa për fëmijët nën 15 vjet. Sistemi i sigurimeve shëndetësore do ta mbulojë koston e shërimit për secilin qytetarë të Kosovës. Kemi sigurime për vetura por jo sigurime shëndetësore për njerëzit. E vetmja shpresë është nr 35. Me qeverisjen e PDK-së e LDK-së mungesa e strehimit sa më shumë rritej. Politikat e tyre të strehimit ishin fatkeqësi për popullin. Ne do u ndihmojmë 4000 familje të bëhen pronarë të një banese, e ky do jetë investimi më i madh i strehimit për këto 18 vjet pasluftes”.
”Projekti i shujtave në shkolla kushton maksimum 12 milion euro në vit, qeveria e kaluar vetëm për gjysmën e të tillëve ka shpenzuar 24 milionë euro. Ndryshimi duhet të bëhet me Vetëvendosjen. Është e vetmja shpresë për zvogëlimin e papunësisë e për të rritur standardin e jetës e përmirësimin e financave publike. Modeli i tyre financiar ka qenë shkatërrues për ekonominë. Ne do ta investojmë paranë tonë në vendin tonë për vendin tonë për rininë tonë për ardhmërinë tonë”.
”Shumë prokurorë pas luftës i kanë ndjekur hajnat me drita të gjata. Me Qeverinë e Vetëvendosjes do të ketë ligj Anti-Mafia. Në ardhmërinë e qeverisjes së Vetëvendosjes nuk ka më fëmijë të uritur. Për punëtorin ka të drejta. Një faqe e re e historisë tonë, do të qelet më 11 qershor. Ringjallja e institucioneve publike do të jetë puna jonë e parë me Vetëvendosjen në qeverisje”.