Deputetja e LAA-së, Mimoza Kusari-Lila ka reaguar për sulmin ndaj gruas së ministrit Blerand Stavileci, për të cilin PDK’ja akuzoi VV-në.
Kusari-Lila thotë se Vitore Stavileci është viktimë e huliganizmit, dhe nuk duhet të ketë asnjë petk politik që e mbron këtë sjellje.
“Ne kemi bindje të ndryshme politike por nuk rrahemi për to, se atëherë s’kemi nevojë për shtet por për ring boksi që të fitojë më i forti”, shkruan në facebook kandidatja për kryetare të Gjakovës.
Ky është reagimi i plotë i Mimoza Kusari-Lilës:
Vitore Stavileci është grua me emër dhe mbiemër, integritet dhe dinjitet të vetin personal, shtesë është Nënë, motër, bashkëshorte dhe asnjëri nga atributet e saj nuk e meriton të ushtrohet dhunë ndaj saj, ashtu sikur asnjë qenie e gjallë nuk rrahet për se është gruaja apo Nëna e dikujt.
Vitorja është viktimë e huliganizmit dhe nuk ka arsye apo petk politik që e mbulon huliganizmin.
Ne kemi bindje të ndryshme politike por nuk rrahemi për to, se atëherë s’kemi nevojë për shtet por për ring boksi që të fitojë më i forti.
Ftoj organet e drejtësisë edhe pse deri me tani shpesh pa sukses, të gjejnë autorët dhe të zbardhin rastin dhe prapavijën e kësaj dhune në mënyrë që të ketë paqe dhe qetësi për të gjithë në shoqëri.
Ndërsa denojmë për aktin e shëmtuar dhe ftoj të gjithë pa përjashtim të besojmë në drejtësi dhe demokraci dhe i uroj shërim të shpejtë Vitores.
