Masat mbrojtëse në ceremoninë e Oscars: Maskat do të kenë rol të rëndësishëm

19.04.2021 15:42:56

Organizatorët e ceremonisë së ndarjes së çmimeve Oscar i kanë zbuluar disa prej masave të sigurisë dhe protokolleve që do të jenë në fuqi gjatë evenimentit treorësh.

Ata kanë siguruar se janë duke i marrë të gjitha masat për t’u siguruar që të gjithë të nominuarit dhe pjesëmarrësit të jenë të sigurtë, ndërsa maskat mbrojtëse do të luajnë një rol të madh në ceremoni.

Organizatorët Jesse Collins, Stacey Sher dhe Steven Soderbergh, kanë shpjeguar se protokollet për COVID-19 do të integrohen në ceremoninë që mbahet më 25 prill.

Soderbergh dhe Sher, të cilët punuan në filmin “Contagion” nga viti 2011, ishin veçanërisht të përshtatshëm për rolin e organizatorëve në kushte të tilla, duke pasur parasysh përvojën e mëparshme që kërkonte punë afatgjatë me epidemiologët.

“Ne jemi vërtet të lumtur që kemi mundur ta bëjmë këtë film së bashku 10 vjet më parë, kur takuam disa nga epidemiologët kryesorë në botë, ata u përfshinë dhe na këshilluan”, ka deklaruar Sher.

“Ne kemi pasur shumë praktikë. Kjo industri ka marrë drejtimin në krijimin e protokolleve për kthimin e sigurt të njerëzve në punë. Ne dimë si t’i qasemi situatave si kjo”, është shprehur Soderbergh.

Ata theksuan se e gjithë situata në lidhje me organizimin e sigurisë së ngjarjes “ishte tepër e rrjedhshme” në një përpjekje për t’iu përmbajtur udhëzimeve për sa i përket kapacitetit dhe zhvendosjes së njerëzve dhe afatit kohor për sa kohë ata mund të qëndrojnë në vende të caktuara, duke shtuar se nuk ka asnjë shans që “ta vënë dikë në rrezik”.

“Ne shpresojmë të kombinojmë protokollet e sigurisë me një ngjarje që do të jetë një pasqyrë e asaj që do të jetë e mundur kur shumica e njerëzve vaksinohen”, ka shtuar Sher.

“Maskat do të luajnë një rol shumë të rëndësishëm në historinë e darkës. Kjo temë është thelbësore për mbrëmjen”, ka thënë Soderbergh pa shpjegime të mëtejshme lidhur me pyetjen e mbajtjes së maskave.

Ndarja e çmimeve Oscar do të mbahet më 25 prill në dy vende – Union Station në Los Angeles dhe Dolby Theatre në Hollywood Highland Center dhe me përfshirje nga vende të tjera ndërkombëtare përmes lidhjeve të drejtpërdrejta.