Aleanca për Ardhmërinë e Kosovës (AAK), ka mbajtur sot mbledhjen e Këshillit Drejtues dhe të Kryesisë.
Aleanca për Ardhmërinë e Kosovës, mbajti sot mbledhjen e Këshillit Drejtues dhe të Kryesisë, nën kryesimin e kryetarit të partisë, Ramush Haradinaj, ku të pranishëm ishin edhe kryetarët e degëve.
Siç bëhet e ditur në njoftim, në këtë mbledhje u diskutua për zhvillimet politike në vend si dhe caktuan shtabin zgjedhor për zgjedhjet e jashtëzakonshme në vend pas dorëheqjes së Haradinajt nga posti i kryeministrit, shkruan lajmi.net.
Sipas njoftimit, Aleanca për Ardhmërinë e Kosovës shprehu besimin e plotë që kjo gjendje do të tejkalohet duke u bazuar në Kushtetutën dhe ligjet në fuqi si dhe nuk do të ketë vakum institucional.
“Forumet e partisë shprehen vullnetin e madh që AAK të garojë e vetme në këto zgjedhje por duke mos përjashtuar bashkëpunimet me partitë që kanë orientime politike të njëjta”, thuhet në njoftim.
Këshilli Drejtues në takim votoi për emërimin e Albena Reshitaj nënkryetare të AAK-së si dhe të Bajram Hasanit anëtar i Kryesisë.
