Në takimin që zhvilloi me studentët në “Korpusin Universitar” të Tiranës, kryedmeokrati Lulzim Basha e përqendroi fjalën e tij tek hapja e Partisë Demokratike dhe integrimi e promovimi i të rinjve në strukturat drejtuese të saj.
“Unë jam i vendosur ta demokratizoj dhe modernizoj PD dhe për këtë kam mbështetjen e botës perëndimore, të Partisë Konservatore, të Partisë Kristiandemokrate të Partisë Republike të SHBA. Sistemi që ne do të adoptojmë është një sistem që e hap PD. E hap ndaj çdo kujt që ndan vlerat tona dhe i jep mundësi përmes garës që të kontribuojnë. Që të ndryshojë politika duhet të ndryshojnë partitë politike. Nëse brenda partive gjithë vendimmarrja është në dorën e një njeriu, në rastin konkret të kryetarit të partisë që bën listën e deputetëve ashtu do të jetë nesër dhe shteti në dorën e një njeriu. Ne do ti japim fund kësaj praktike, duke nisur brenda PD sot dhe nesër në qeverisje”, tha ai.
Duke folur për Shqipëri përfshirëse, ai theksoi se PD do të ndjekë modelin evropian të zgjedhjes së kandidatëve për deputetë e kryebashkiakë. Shumë shpejt tha Basha, PD do të publikojë online formularin për ata që duan të aplikojnë për kandidat për deputet apo kryetar bashkie.
“Me procesin e zgjedhjes së kandidatëve ne do të ndjekim modelin evropian, do të mundësojmë që çdokush që ka interes të përfaqësojë politikisht qytetarët, komunitetin, në çdo nivel, kryebashkiak apo deputet të kenë mundësi të kandidojnë. Do ta bëjmë këtë duke i pamundësuar kandidimin personave me rekorde kriminale apo atyre që nuk janë të aftë. Britanikët po na ndihmojnë që ne të ndërtojmë një mënyrë të zbatimit të këtyre rregullave. Nesër pasnesër ju do të shikoni vetë kur PD do të botojë online formularë të aplikimit për ata që dëshirojnë të jenë kandidatë në zgjedhjet e ardhshme në emër të PD. Do të jetë merita që do të përcaktojë se kush do të jetë ai apo jo që do të përfitojë përmes votës së lirë dhe vlerësimit transparent që do të përfaqësojë PD në një parlament të çliruar nga krimi dhe kriminelët”, theksoi lideri i opozitës.
