Deputetja e Parlamentit shqiptar, Mimoza Hafizi, e cila po vëzhgon nga afër votimin në Amerikë për presidentin, kërkon që i njëjti shembull votimi dhe numërimi votash të ndiet edhe në vendin tonë.
Sipas deputetes, mjaftojnë vetëm 10 sekonda për të kaluar në sistem votën, duke larguar kështu streset dhe rraskapitjet që kalojnë vëzhguesit, numëruesit e çdo qendre votimi.
“Ditë e veçantë në SHBA, si vëzhguese e zgjedhjeve, deleguar nga Asambleja Parlamentare e OSBE. Jam shumë e vëmendshme ndaj mënyrës elektronike të numërimit të votës. Çdo votues, pasi plotëson fletën e votimit, e fut vetë te makina e numërimit. Vetëm 10 sekonda! As dhjetëra mijra numërues, as qindra makina që transportojnë kutitë, as dhjetra mijëra vëzhgues të stresuar, as ditë të tëra zvarritjeje për rezultatin. Vetëm 10 sekonda, në një kompjuter të thjeshtë, që mund ta ketë pa problem çdo qendër votimi edhe në Shqipëri. S’ka asnjë arsye bindëse që ky sistem numërimi të mos pranohet në zgjedhjet tona”, shkruan deputetja shqiptare.
