Me 31 mars 2018, Revista “Kuvendi”, organizoi promovimin e librit të autores së re nga Kosova, Qëndresa Halili, “WAR DIARY” -We Children of Kosovo. We Children of The War”.
Për librin e Qëndresës folën poeti Ruzhdi Gurra, gazetari dhe shkrimtari i njohur Zef Pergega, publicisti Rush Dragu, poetja Elinda Marku, gazetari i ACTV dhe veteran i Luftës së Kosovës, Luigj Gjokaj, dashamirësi i librit, Fran Vokrri, ish mësuesi dhe aktivisti Mark Loci, poeti dhe botuesi i Kuvendit, Pjetër Jaku.
“Ditari i Luftës” është botuar në gjuhën angleze nga një shtëpi botuese në New York, ku punon dhe jeton autorja.
Qëndresa, në fjalën e saj falënderoi Kuvendin, i cili dhe e kishte ftuar e pritur që në fillimin e saj në jetën amerikane, ( në vjeshtën e vitit 2014). Po ashtu, autorja falënderoi gjithë të pranishmit, në mesin e të cilëve ishte ndjerë mirë që kur kishte shkelur në Amerikë, në vendin e ëndrrave.
“Libri është një përjetim dhe një mënyrë të pari të Luftës së Kosovës, nga një fëmijë vetëm 9 vjeçar, në atë periudhë. Një përjetim i trishtë, që sa herë e mendoj më çon në ato vite te frikshme!”, tha autorja.
Poetja Elinda Marku, pasi foli për vlerat e librit, tha se Qëndresa është një vajzë e talentuar që kërkon vazhdimisht lirinë. Poeti Ruzhdi Gurra solli një rast që e kishte parë me sytë e tij, kur punonte në Kosovë, me forcat Amerikane të NATO-s, se si nga një familje kishte shpëtuar vetëm një fëmijë, e cila për disa ditë kishte mbijetuar në rrënojat e shtëpisë së shkatërruar nga lufta barbare e makinerisë ushtarake, antinjerëzore serbe. Zef Pergega theksoi rëndësinë e publikimeve të këtyre lloj librash që veç e pasurojnë memorien kombëtare.
Në këtë promovim dinjitoz dhe të mirë-organizuar merrnin pjesë me mjetet e tyre, televizionet e komunitetit, ACTV dhe ALBDREAMS TV, me pronarët Arben Spahiu dhe Rush Dragu. Aktivitetin e filmoi Kolë Vasili.
Pjesë nga libri u lexuan nga Mara Jaku, nxënëse në klasën e 7-të, Aida Gjergji, Elinda Marku dhe vet autorja.
Në fund, autorja ua nënshkroi librin të pranishmëve.
