Zyra e Prokurorit francez ka rekomanduar që ish-presidenti Nicolas Sarkozy të përballet me gjyqin për abuzime me fondet gjatë fushatës elektorale të zgjedhjeve presidenciale të vitit 2012.
Deklarata pason një hetim të gjatë mbi akuzat se partia e asaj kohe e Sarkozit UMP, ka falsifikuar llogaritë me qëllim fshehjen e 18 milionë eurove shpenzime gjatë 2012. Sarkozi humbi garën presidenciale të atij viti përballë rivalit Francois Hollande, por shpreson që të kandidojë sërish në zgjedhjet e vitit të ardhshëm.
Sa u përket akuzave vetë Sarkozi është mbrojtur duke thënë se me fondet e fushatës merren vartësit e tij. Rekomandimi i bërë nga prokuroria e Parisit nuk është definitive, teksa një trupë gjyqësore duhet të marrë një vendim përfundimtar nëse Sarkozi duhet të dalë apo jo në gjyq.
Por prokurori i Parisit argumenton se si kandidat, Sarkozy ka qenë në fund të fundit përgjegjës për fushatën e tij dhe në çdo rast ka gjithashtu prova të konsiderueshme se ai ishte paralajmëruar në kohë mbi rrezikun e kalimit të limiteve të shpenzimeve. Të gjitha këto akuza dhe probleme ligjore janë hijet e errëta që rëndojnë mbi shpresat e ish presidentit Sarkozi për tu rikthyer sërish në krye të Pallatit Elize.
Çështja kompromentuese njihet si skandali i Bygmalion. Në qendër është partia e Nicolas Sarkozi që aso kohe njihej me emrin UMP e cila akuzohet se në bashkëpunim me kompaninë PR ka fshehur kostot e fushatës elektorale të vitit 2012.
Shteti francez ka caktuar kufij në lidhje me shpenzimet e fushatave dhe dyshohet se firma Bygmailon ka derdhur të ardhura drejtpërdrejt në llogarinë e Sarkozisë duke i dhënë mundësinë që të shpenzojë më shumë se sa limiti i caktuar për fushatën e tij.
Disa prej pjesëtarëve të partisë UMP janë zyrtarisht nën akuzë, megjithëse ish presidenti Sarkozi ka deklaruar se nuk ka qenë në dijeni të shpenzimit të paligjshëm të partisë së tij.