Shqipëri/ “ISIS po rrëmben fëmijë në Burrel”, policia: S’është e vërtetë, hetuam një javë

24.09.2018 21:43:20

Fotografitë e një personi të veshur me uniformën e ISIS-it në qytetin e Burrelit që qarkullon në internet. Ka shkaktuar panik tek qytetarët.  Madje thuhej se personi në fjali kishte si qëllim rrëmbimin e fëmijëve. Kjo gjë ka vënë në lëvizje policinë për një javë rresht, e cila doli në konkluzionin se nuk ekziston një kërcënim i tillë.

Deklarata e plotë e policisë

Në lidhje me një foto që qarkullon në disa rrjete sociale ditët e fundit ku bëhet fjalë për një shtetas se dyshohet që është veshur me uniformën e ISIS dhe qarkullon në qytetin e Burrelit, si dhe dyshohet se ka dashur të rrëmbejë dy fëmijë ju informojmë se:

Menjëherë nga Drejtoria Vendore e Policisë Dibër dhe Policia Lokale Burrel, është ngritur një grup i posaçëm për të verifikuar informacionet.

Nga Grupi i posaçëm , janë kryer vëzhgime nga kamerat e bizneseve ku dyshohej se ishte filmuar personi, janë kryer veprime me metoda speciale për një javë rresht.

Është monitoruar qyteti natën dhe ditën me dron.

Po në lidhje me këtë informacion Drejtori Vendor i Policisë Dibër sëbashku me Shefin e Komisariatit të Policisë Mat, kanë kryer një analizë të hollësishme për këtë rast, si dhe kanë marrë kontakt me qytetarë të shumtë, me pronarët e bizneseve dhe me gazetarë.

Nga tërësia e veprimeve të kryera ka rezultuar se informacioni që po qarkullon është tërësisht i pa vërtetë dhe dashakeqës, pasi nuk është evidentuar asnjë person në asnjë kamer biznesi me logo të ISIS, as nga monitorimi me dron nga një grup i posaçëm nga Drejtoria e Përgjitshme e Policisë së Shtetit si dhe nuk ka asnjë kallëzim nga qytetarët për rrëmbim personash.

Nisur nga këto Drejtoria Vendore e Policisë Dibër dhe Policia lokale e Burrelit, shprehin keqardhje për këto disinfrmacione dashakeqe duke përhapur panik tek qytetarët.

Këto informacione të pavërteta dhe tërësisht dashakeqe me prapaijë të errët kanë për qëllim të nxijnë punën e policisë dhe të sfumojnë sado pak rezultatet që Policia e Shtetit po arrin në luftë ndaj krimit të organizuar dhe krimit në tërësi.

Theksojmë se në qytetin e Burrelit dhe rrethin e Matit prej një viti nuk është shënuar asnjë vrasje apo ngjarje e rëndë kriminale, janë ulur ndjeshëm rastet e vjedhjes kundër pronës, si dhe nuk është konstatuar asnjë rast i kultivimit të bimëve narkotike.

Të gjitha këto tregojnë angazhim dhe seriozitet të strukturave të Policisë si dhe bashkëpunim mjaft të mirë me Komunitetin.

Policia e Shtetit garanton qytetarët se është maksimalisht e angazhuar për të garantuar rendin dhe sigurinë si dhe për të goditur me forcën e ligjit krimin e organizuar por dhe krimin në përgjithësi, si dhe fton qytetarët që të denoncojnë në numrin 112 çdo shkelje të ligjit duke garantuar anonimatin, si dhe një reagim të shpejtë e profesional të Policisë.