Futbolli shqiptar dhe veçanërisht klubi i Tiranës sot është në zi, pasi ndahet nga jeta i madhi Fatmir Frashëri.
Pati fituar shumë beteja në fushën e blertë, kombëtare e ndërkombëtare, por atë me sëmundjen, edhe pse u përpoq shumë nuk arriti që t’ia dilte.
Fatmir Frashëri, një nga kolosët e futbollit bardheblu dhe një pjesë e historisë së 24-herë kampionëve dhe futbollit shqiptar u nda nga jeta në moshën 78-vjeçare.
Fatmir Frashëri ka qenë jo vetëm një ish-lojtar triumfator dhe fitues trofesh te Tirana, por edhe një trajner i suksesshëm si dhe president nderi te bardheblutë një dekadë e gjysmë më parë.
I lindur në 3 prill të vitit 1941, Frashëri arriti të shkruante historinë me bardheblutë duke fituar 4 herë kampionatin si futbollist dhe 1 herë si trajner i Tiranës.
Gjithashtu Frashëri është shpallur kampion edhe gjatë kohës që drejtonte Dinamon.
Ish-mbrojtësi është vlerësuar edhe me titullin “Mjeshtër i Madh”.
