Kryetarja e Lëvizjes Socialiste për Integrim, Monika Kryemadhi ka kërkuar sot nga Kryeministri Edi Rama që të shpallë gjendjen e jashtëzakonshme për situatën e krijuar në zonat e përmbytjeve. Kryemadhi thotë se qeveria nuk duhet të humbasë më kohë për të mobilizuar gjithë strukturat e shtetit dhe të nis mbledhjen e fondeve për dëmshpërblimin e qytetarëve.
Duke shprehur solidaritetin me gjithë familjet e dëmtuara, Kryemadhi shprehet se çdo vonesë e qeverisë mund të sjellë pasoja për shëndetin e njerëzve, por edhe për dëmet materiale fatura e të cilave shtohet në çdo minutë që kalon
“Jemi pranë të gjitha familjeve të cilat po përballen me një vështirësi të jashtëzakonshme, të diktuar nga kjo fatkeqësi natyrore e rëndë. Solidaritet me të gjithë të prekurit anë e mbanë vendit nga kjo fatkeqësi e dimensioneve shumë të gjera.
Qeveria shqiptare duhet të mos humbasë më kohë, por në respekt të ligjit të shpallë gjendjen e jashtëzakonshme, të mobilizojë fonde financiare, ndihma ushqimore, logjistikën e duhur që situata të kalohet me sa më pak dhimbje për mijëra qytetarët e prekur. Koha nuk pret! Çdo hezitim mund të sjellë pasoja të pakthyeshme në shëndetin e njerëzve, në banesat e tyre, në mijëra biznese që dëmtohen, prandaj duhet vepruar me shpejtësi!”,- deklaroi Kryemadhi.
